之前有好多「5G網絡係疫情大爆發嘅主要原因」呢一類錯誤嘅言論喺各大社交網絡流傳。
呢啲傳聞一路都冇停止過，所以 Twitter 終於都採取行動，喺呢一啲推文度加上「真確性有待核實」呢個備註。
對於呢類錯誤嘅推文，Twitter 嘅做法並唔係將佢全部刪除或者隱藏，而係喺推文上面顯示一個備註，備註內容大概係「請了解疫症相關事實」。點擊之後，用戶會被帶到去一個叫做「5G並未導致疫情擴散」嘅網頁，網頁裏面會有其他可靠嘅媒體網站同官方資料嘅網站連結，等用戶可以得到一啲關於疫情嘅正確消息同資料。
Twitter 發言人話佢哋都會盡量將一啲相關嘅錯誤言論刪除。但係每一日嘅推文數量實在太多，唔可能對每一條包含有關疫情嘅不實或者有爭議嘅推文都全部刪除。所以就推出咗今次呢個方法，希望可以盡量減少一啲假消息嘅傳播。
Twitter 上個月曾經話過會對有關疫情嘅錯誤消息進行核實。之前喺英國有大量5G基站被燒毀，甚至有工程人員喺街上被騷擾。發生呢啲事好大程度上係因為有人誤信咗5G技術同疫情有關呢類假消息。上個月英國大約有77個5G基站被燒毀。
一直以嚟，包括Twitter、YouTube 同 Facebook 等等嘅科技公司都被指冇就5G同疫情有關呢類假消息作出行動而導致好多人信以為真。
但係事實上，一路都冇證據可以證實到5G同疫情有任何關係。世界衛生組織同其他流動通訊專家亦都多次澄清，5G唔會導致疫情擴散，同疫情嘅爆發更加係冇任何直接或間接嘅關係。
自從華為被美國窮追猛打之後，英國對華為嘅態度一路都係左搖右擺，一時一樣。
最新消息傳出，英國將會準許華為喺劍橋郡興建研發中心。中心主要係研究同開發芯片。
另外為免美國制裁會影響華為設備嘅供貨能力，英國安全部門提醒電訊商要有充足嘅華為設備存貨。
根據《星期日泰晤士報》報道，南劍橋郡議會將會喺今個星期批准華為喺薩斯頓（Sawston）耗資4億英鎊（約38.3億港幣）興建研發中心。
另外，知情人士透露，英國國家網絡安全中心 (NCSC) 高級官員上星期曾經打電話俾英國電信同 Vodafone。
NCSC 提醒佢哋需要確保嚟自所有零件制造商嘅零件存貨量充足。 同埋要密切留意華為喺美國嘅打壓之下，未來為自己產品提供軟件升級嘅能力。
另一方面，德國電信喺啱啱舉行完嘅股東大會裏面亦都提到佢哋反對禁止採用華為嘅電信網絡設備。
德國電信一份內部文件評估認為，如果德國聯邦政府反對使用華為5G技術，公司預計將會至少損失30億歐元。 而淘汰已經安裝4G網絡關鍵部份嘅華為產品，可能需要長達5年時間。
德國電信喺6月17號開始正式提供5G服務，預計到7月中，德國有一半人口能夠使用5G網絡。
華為同世界各地電訊網絡嘅關係確係千絲萬縷，難分難解。
最新內容
預計 2021 年尾，5G 流動網絡用戶將超過 5.8 億
愛立信之前發表左一個研究報告，根據佢哋嘅預測，到 2021 年尾，5G 流動網絡用戶將會超過 5.8 億，估計每日新增 100 萬個 5G 流動用戶。
呢個預測結果亦增強咗電訊業對 5G 會成為普及速度最快嘅一代流動網絡嘅信心。 預計到 2026 年底，5G...
台灣中華電信加大5G投資金額全力搶佔5G霸主地位
台灣5G流動網絡嘅競爭已經進入白熱化階段。
中華電信為咗搶佔5G網絡覆蓋第一，早幾日再次公佈將會耗資30.46億台幣向愛立信購買新一輪嘅5G設備。
加上6月中向諾基亞購買嘅23.9億設施，合計6月就已經增加咗54.36億嘅5G設備支出。
由於中華電信喺年頭嘅時候已經用咗125.9億去添置5G設備，到現時為止2021年5G設備花費超過180億。 而2020年亦用咗73.85億喺5G設施上面。即係話中華電信由舊年6月尾5G開台，截至目前為止5G設備採購金額已幾高達254.11億。 係台灣五大流動網絡提供商當中投資最多嘅一間。
根據截至今年4月30號嘅最新統計數字，台灣4G基站總數達到10萬4,507座。其中，中華電信30,357座、市佔率最高，有29%。其次係遠傳23,323座、台灣大哥大22,711座、台灣之星16,646座，以及亞太電信嘅11,570座。
加拿大即將重啟5G頻譜拍賣
由於受到疫情影響嘅關係，加拿大將5G頻譜嘅拍賣時間推遲咗。嚟緊終於都可以重啟啦。
5G流動網絡其中一個好重要嘅頻譜3500MHz，加拿大各個流動網絡提供商都對呢個拍賣期待咗好耐。 本來加拿大計劃2020年6月舉行拍賣，但係受疫情影響一拖再拖之下，直到依家先正式開始。估計成個拍賣會持續幾星期，政府將會喺172個加拿大服務地區批出1504個牌照。
Bell、Telus 同 Rogers 係加拿大三間最大規模嘅流動網絡提供商，佢哋加埋差唔多佔咗成個加拿大市場嘅90%。 一啲將會參加今次拍賣嘅小型網絡提供商認為，最近頒佈嘅特殊監管規定有偏袒三大網絡提供商之嫌。
亞太地區5G最高上下載速度排名
國際測速機構 Opensignal 啱啱公佈咗最新嘅亞太地區5G測試報告。
Opensignal 指出，喺亞太地區最快5G網絡冠軍上面，韓國同台灣競爭非常激烈。
韓國5G平均下載速度最快，達到 380.5Mbps。但係台灣最高下載速度高達847.3Mbps、平均上傳速度51.8Mbps、5G影音體驗等三個項目，都成為亞太冠軍。
韓國5G平均下載速度係亞太區冠軍，達到 380.5Mbps。台灣第二，有 353.3Mbps。第三名就係澳洲嘅...
愛立信發表5G消費者研究報告
愛立信之前發表咗一份5G消費者研究報告，呢份係到目前為止同類報告當中規模最大嘅。報告收集咗13億消費者同2.2億5G用戶嘅意見。
報告指出，5G用戶花更多時間喺手機遊戲同AR上面，20%用戶喺升級5G之後減少咗喺屋企同其他地方使用Wi-Fi 。
七成5G用戶期待更多創新服務同應用程式。對於頭批轉用5G嘅用戶嚟講，室內覆蓋範圍嘅重要性比速度又或者電池壽命多兩倍。
愛立信消費者實驗室發表嘅報告研究咗5G對全世界智能電話用戶嘅影響。
而室內覆蓋範圍係今次研究嘅重點領域之一。 五分一5G用戶因為5G流動網絡嘅優點而喺室內減少咗手機Wi-Fi使用。
今次呢份報告係研究咗美國、中國、韓國、英國等26個地方5G消費者嘅取向同意見，代表咗全球13億智能電話用戶，其中包括2.2億5G用戶。
三星希望靠歐洲市場促進5G網絡設備業務增長
據消息報導，三星一名高層透露，隨住世界各地推出5G嘅地方越來越多，歐洲正在成為三星保持公司網絡設備業務增長嘅主力市場。
三星雖然係全世界第一大內存芯片同智能電話生產商，但係市場研究顯示，根據公司最近四季嘅數據以及2021年第一季市佔率10%至15%。
5G網絡設備方面三星只係第五名，排喺華為、愛立信、諾基亞同中興通訊之後。
三星網絡業務執行副總裁喺接受媒體訪問嘅時候表示，隨住舊年9月公司同美國主要流動網絡提供商之一 Verizon 簽訂一份66億美金嘅合約。今年3月又同日本最大流動網絡提供商 NTT Docomo 達成合作協議。
三星喺5G設備上落後於其他公司呢個情況應該會有改變。
台灣計劃撥款幫助網絡提供商 加快建立 5G 網絡
有消息人士透露台灣一項針對 5G 網絡嘅最新計劃。 計劃內容係關於台灣國家通信委員會（NCC）將會撥款 266 億新台幣（9.576 億美金），幫助當地流動網絡提供商將 5G 網絡建設時間由之前預算嘅五年縮短到三年。
計劃仲包括呼籲各個網絡提供商喺五年內增加網絡覆蓋率。希望到時可以將覆蓋率由原來 50% 人口呢個目標，增加到 85% 人口。
73%公司將會喺未來三年投資5G
一間市場上非常有名嘅商業諮詢公司，啱啱發表咗一份對重新塑造電訊行業未來嘅研究報告。
研究報告主力針對商業用戶或者一啲大公司對5G技術嘅睇法。 研究公開咗好多公司都因為疫情嘅關係，對採用5G技術同對物聯網等等新技術嘅興趣大大增加。
研究結果顯示，約71%公司當中有接近四分之三認為疫情大流行有助於加快公司進行數碼化轉型。 其中52%公司對5G同物聯網 (IoT) 嘅興趣比疫情之前大大增加。
巴西計劃下個月進行5G頻譜拍賣
巴西通信部長早兩日表示，政府預計 5G 網絡頻譜拍賣將會喺下個月進行。
佢預計巴西審計法院對拍賣規則嘅質詢唔會推遲拍賣，政府已經對法院所有問題作出回應。
預計巴西所有州份首府都會喺下年 7 月之前推出獨立 5G 網絡。 到2028年，流動網絡提供商必須遵守 5G 頻譜拍賣所有附帶要求。
拍賣要求網絡提供商向巴西所有城市提供 4G 網絡以及向巴西北部地區提供光纖網絡服務 。
必讀
最熱門
一路以來5G其中一個對手遊迷嚟講好重要嘅好處，就係延遲低，玩線上遊戲或者雲端遊戲會比4G更順暢。
究竟5G推出之後係咪可以完全解決雲端遊戲延遲嘅問題仲係衆說紛紜。某大跨國手遊公司負責人就認為未必有想像中噤理想。
可以解決延遲問題嘅原理其實好簡單，5G發射站同手提電話互相交換數據嘅速度快咗。數據傳輸量亦增大咗好多，所以就算同一時間有好多人連線都唔會拖慢速度。
但係有一點唔可以忽略，就係光纖速度。5G暫時未有解決海底光纜嘅問題，跨境嘅流量仍然要經海底光纜，而海底光纜仲存在延遲嘅問題。
所有光纜每走一段就需要用到一個放大器，每經過一個放大器就有幾毫秒嘅延遲，如果光纜路徑比較長，就冇辦法控制延遲。譬如跨越中美就必定有超過10毫秒甚至30毫秒以上嘅延遲。再加上各種設備、環境影響，例如屋企裏面隔咗兩間房，信號唔夠強嘅話，都係會影響到接收。
就現有嘅頻寬同穩定程度嚟講，至少需要5 -10年時間解決問題，先可以真正做到「零延遲」。
有人歡喜有人愁。同樣來自中國，華為同 TikTok 就有唔同嘅命運。
由於受到美國強硬制裁嘅影響，華為前CEO余承東指出，華為目前喺營運方面的確係面對唔少困難。
佢話經過美國4輪制裁之後，華為好多業務都面臨困境，因為好多產品已經唔可以繼續生產而導致嚴重缺貨。
目前華為仲可以生產嘅商品包括耳機、屏幕、手提電腦同路由器等等。
美國商務部長雷蒙多之前接受訪問嘅時候表示，美國會繼續將華為列入貿易黑名單。而之前特朗普政府大力打壓嘅 TikTok 就暫時安全，唔會對佢採取任何行動。
雷蒙多提到華為仍然喺實體清單之內，而且「冇理由」要將佢移出清單。
至於TikTok，喺拜登上任之後已經擱置咗強制TikTok 賣出美國業務嘅計劃。
另一方面，韓國統計機構公佈嘅數據顯示，由於有部份國家禁止使用華為5G設備，2020年第二季到第三季，華為喺5G通信設備市場嘅佔有率由43.7%減少到32.8%。 而愛立信嘅市佔率就由20.7%，增加到30.7%。
除咗愛立信成功拎走華為嘅市場佔有率之外，諾基亞亦都非常努力希望可以將華為同中興失去嘅訂單據為己有。
有消息指出，英國電信開始拆除5G網路當中華為嘅設備，而英國電信將會使用諾基亞5G設備去代替華為。
同時諾基亞亦都成功奪得一部份瑞典嘅5G設備訂單，有望可以再進一步提高5G設備市佔率。
網絡測速機構 Opensignal 發表最新報告，顯示全球 15 個國家/ 地區 5G 總排名。
Opensignal 將現有嘅 5G 速度同 4G 進行比較，針對網速增長進行排名。
平均各個地方喺升級去 5G 之後，都可以有 5-6 倍提升。
沙地阿拉伯進入 5G 時代之後，網速更加提高咗 12.5 倍，成功奪得增長冠軍。而韓國就有 5.6 倍增長得到第二位。如果只係計速度增長，香港相比 4G 時期提高咗 5.3 倍排第八名位。
