韓國係全球第一個推出5G網絡嘅國家,調查顯示,截至5月底,韓國5G用戶已經超過687萬,佔所有流動通信用戶10%。
但近日就再次有報告指出韓國5G流動網絡體驗並唔理想。

分析原因主要有幾個。

第一,韓國5G係以非獨立模式同4G共享網絡,喺接收唔到5G信號嘅地方會自動轉為4G。由於5G信號傳輸距離短,基站數量本應要比4G更多更密集,但截至5月1號,韓國5G基站數量為11.5萬個,只係4G基站數量嘅13%。

第二,目前韓國三大流動電訊營運商5G速度只係快4G大約3-5倍。要想實現理論上20倍速度,需要更高頻段嘅基站配套,而韓國現有5G基站以及5G設備都達唔到標準。根據通信業界分析,韓國進入真正5G時代至少仲需要2-3年。

第三,韓國好多5G用戶都表示目前適用5G嘅各種消閒娛樂內容唔多。如果要睇高清影片,用4G或者WIFI一樣可以順暢播放。但係韓國三大電訊營運商5G月費由每月5.5萬韓圜起(大約350到550港幣),比4G月費高出65到135港幣。

用戶認為月費支出多咗,但係暫時見唔到5G同4G有太大分別。

韓國消費者組織表示,近三分之一消費者因為對5G服務唔滿意想要同電訊公司解約。希望各韓國網絡商可以盡快升級5G網絡,令用戶們覺得選用5G喺正確嘅選擇。

LEAVE A REPLY

Please enter your comment!
Please enter your name here