韓國放送通信委員會近日以非法為客戶提供補貼為理由,韓國三大電信營運商合共被罰512億韓圜(約港幣3億3千萬)嘅高額罰款。今次係自從韓國頒布相關法例之後對電信營運商最高數目嘅一次懲罰。

韓國放送通信委員會今次對韓國三大電信營運商開出呢個高額罰款,最主要係因為韓國5G服務推出之後,三大電信營運商嘅119間門市對5G上台用戶提供超額補貼。
平均每人嘅補貼超出法例規定24.6萬韓圜(約港幣1600)。呢啲非法補貼通常以現金、贈品等形式發放,甚至仲有門市用上台就送5G電話作為吸引客戶嘅賣點。

實際上按照法例規定,今次三大營運商嘅總罰款應該會達到933億韓圜(約港幣6億)。不過考慮到疫情嘅影響,同埋營運商喺5G網絡推出初期好努力去推廣呢項新服務,政府決定網開一面,將罰款降到512億韓圜(約港幣3億3千萬),但仍然係史上流動網絡相關最高額嘅刑罰。
其中5G用戶最多嘅SK電訊罰款金額最高,要223億韓圜(約港幣1億5千萬),佔整體罰款四成多。

截至5月底,韓國5G用戶已經超過687萬,佔所有流動通信用戶10%。但係調查顯示,由於5G基站數量有限,韓國5G用戶只有15%嘅時間係可以使用5G網絡,其餘時間基本都係轉番做4G。
所以喺5G服務質量備受質疑嘅時候,韓國5G用戶仍然可以快速增長,背後好大原因係靠營運商大手筆非法補貼。

由舊年下半年計起,韓國每月平均5G上台人數一​​直保持30萬人左右,預計營運商非法補貼減少之後,5G用戶嘅增長速度亦可能會減慢。

LEAVE A REPLY

Please enter your comment!
Please enter your name here