英國決定將華為排除出5G網絡建設後,日媒有消息指英國政府準備請求日本幫助建立5G網絡。

據報導,英國認為日本嘅 NEC 同富士通集團可以取代華為,成為英國5G網絡設備供應商。英國官員已經要求日方提供支持,以提高5G網絡技術同成本效率。

英國嘅目標係令到日本公司同瑞典嘅愛立信,芬蘭嘅諾基亞等其他西方科技公司展開競爭,從而推動呢啲公司去開發適合英國電信公司採用嘅低成本產品。

7月14日,英國政府決定,自2021年起禁止英國流動網絡營運商購買華為5G設備,並要喺2027年以前移除現有網絡裏面所有華為設備。

英國喺7月14號宣佈將華為剔出英國5G設備供應後兩日,英國政府官員就會見咗包括日本國家安全保障局、國家網絡安全事件整備和戰略中心等等日本政府機構嘅代表尋求合作。日本方面也認為有必要同英國企業合作開發5G技術。

華為、愛立信、諾基亞三間公司控制咗全球5G近80%市場,日本 NEC 同富士通控制比例唔到1%。雖然依家愛立信同諾基亞喺英國佔主導地位,但係如果日本公司可以滿足到英國嘅質量要求,提供低成本產品,日本公司或者可以擴大佢哋喺英國嘅市場比率。

報導中亦提及,日本政府已經決定投資700億日元去支持 NEC 等企業開發基站設備同網絡。資金會嚟自一個獨立嘅行政機構—新能源和工業技術發展組織。

不過全世界第二大電訊營運商 Vodafone 同英國電信都警告,佢哋至少需要5年、甚至係7年時間,先至可以恢復棄用華為對英國網絡建設造成嘅重大干擾。

LEAVE A REPLY

Please enter your comment!
Please enter your name here