當美國特朗普政府正在大力封殺華為嘅時候,美國晶片製造商高通(Qualcomm)就喺呢個時候同華為達成一項長期合作協議,而糾纏咗好耐嘅專利糾紛亦都同時解決咗。

特朗普政府一直指控中國政府透過華為,對美國從事間諜活動,威脅美國國家安全。中國同華為方面一路都堅決否認,批評特朗普政府無理打壓。

高通喺星期三正式宣佈,同華為解決咗一項長期嘅專利糾紛。佢哋會一次收取華為過往未支付嘅專利費用,呢筆專利費用會高達18億美金(約140億港元)。
另外高通又同華為達成一項多年協議,授權華為使用高通專利技術。高通嘅股價喺消息傳出之後大升12%。

美國商務部之前對華為實施限制,令到高通唔可以向華為出售晶片。不過高通今次同華為嘅專利協議並唔包含喺呢個限制範圍之內。

高通喺5G技術發展裏面扮演一個好重要嘅角色。美國政府2018年曾經阻止當時總部喺新加坡嘅另一間晶片商 Broadcom,用1,170億美金收購高通。原因係認為收購不利美國5G技術嘅獨立發展,令中國優勢更加明顯。

高通嘅業務主要分為晶片製造,同埋專利授權兩大部分,當中好多都同流動通訊有關。
不過高通嘅專利授權業務近年都捲入唔少商業糾紛,部分公司認為高通藉住作為主要晶片製造商呢個身份,收取唔合理嘅專利費用。

Apple 舊年先同高通解決咗佢哋之間嘅專利費用糾紛,外界推測 Apple 可能俾咗高達60億美金高通。

不過高通目前亦都同美國聯邦貿易委員會(FTC)打緊官司,佢哋之前喺反壟斷嘅官司裏面輸咗,依家正在上訴當中。

LEAVE A REPLY

Please enter your comment!
Please enter your name here