日本電訊商 KDDI 公司高層表示,受疫情影響,5G普及速度比預期慢。

KDDI 執行副總裁喺尋日發表嘅一份收益簡報當中提到。生意額經過4月同5月份因為疫情大流行而暴跌之後,公司喺6月同7月份嘅生意額已經開始慢慢復甦。
不過佢都承認,5G市場喺未來幾季嘅發展情況非常難預測。

佢所講嘅係 KDDI 旗下主要流動電訊品牌 au。公司對 au 嘅 5G 服務存在一定嘅擔憂。而由於要考慮到各種唔同嘅因素,公司到今日為止都仲未定出一個清楚嘅 5G 發展計劃。

雖然 5G 網絡已經推出咗幾個月,不過 KDDI 就冇透露選用咗 5G 服務嘅實際用戶人數。

au 喺啱啱過去嘅季度增加咗 600,000 個主要選用 4G 嘅客戶,總用戶人數達到 5924 萬;而次品牌 UQ 就增加咗 219,000 名客戶,達到3470萬人。

日本電訊商當中排名第二嘅 KDDI ,喺 5G 服務嘅定價方面非常進取。無限數據計劃嘅價格低至 3,460日元(大概250港元),並以 4G 嘅價錢提供為期兩年嘅 5G 服務。

KDDI 總裁喺3月推出 5G 服務嘅時候曾經講過呢個定價非常「大膽」。佢同時亦都話公司嘅目標係喺下年3月完結嘅財政年度獲得200萬以上嘅 5G 用戶。

雖然暫時 5G 用戶人數比預期低,但係佢哋強調公司對於 5G 嘅網絡部署唔會因為咁而有所延誤。之前定落喺2021年3月部署10,000個基站,到2023年3月部署50,000個基站嘅目標會如期實現。

LEAVE A REPLY

Please enter your comment!
Please enter your name here