香港5G網絡推出市場已經有4個月,究竟使用5G嘅人數多唔多呢?香港電訊啱啱就公佈咗今年上半年嘅業績。

由4月1號開始推出5G服務嚟計,香港電訊認為初步5G用戶增長數量情況樂觀,截至目前為止已經有接近10萬名5G客戶。
佔咗佢哋流動通訊客戶人數大概4%,保守估計去到今年年底之前比例會增加到6%至8%。

公司發言人亦指出,隨住5G智能電話逐漸開始普及,第四季亦會有更多唔同款式同價錢嘅5G電話推出,應該可以加快5G用戶嘅增長量。

目前香港電訊嘅目標仍然係喺今季完結之前,將5G覆蓋範圍擴大到90%去準備第四季迅速增長嘅5G需求。
公司亦都有計畫將室內覆蓋逐步擴大,包括交通要點、港鐵以及其他重要嘅商場等等。

另外喺價錢方面,5G服務計畫平均收費比依家每位用戶嘅平均消費額增加咗大約70蚊。

5G網絡將會成為公司嘅發展動力。隨住5G信號覆蓋率越嚟越完善,相信用戶升級5G服務嘅意欲亦都會大大增加。

LEAVE A REPLY

Please enter your comment!
Please enter your name here