近來中國同美國喺5G技術上面鬥得難分難解。美國努力拉攏盟友封殺中國5G設備嘅同時,中國5G嘅成績似乎仍然係非常之好。

中國三大電信商嘅半年年報近期陸續出爐,顯示目前內地5G用戶人數已經突破1億。有美國媒體分析指出,龐大嘅國內用戶量,代表咗中國就算只靠內需已經有機會打贏5G呢場仗。

中國舊年11月1號正式推出5G流動網絡,三大電信營運商中國移動 、中國聯通 、中國電信 2020頭半年嘅成績表已經出咗。

三大營運商喺今年上半年合共投資咗1699億人民幣,其中用喺5G網路建設嘅支出就達到879.53億人民幣。

至於5G用戶人數方面,截至6月底,中國移動同中國電信5G用戶人數加埋有1.08億,聯通就冇公佈5G用戶實際數字。

內地過億嘅用戶人數顯示咗對5G龐大嘅需求,只係內需都已經可以推動到5G產業發展,抵銷美國發動全球封殺嘅影響。

據了解,到咗今年年底,中國預計將會有超過50萬座5G基站,而最終目標係500萬座。遠遠超過依家嘅20萬座,可以支援到數以億計嘅5G新用戶。

相比之下,統計指美國截至今年中嘅5G用戶只有大約400萬左右。
而南韓截至6月為止就有大概737萬名5G用戶。

而中國今年下半年5G網絡亦會持續快速擴展。中國移動將今年5G新建基站嘅目標數量由25萬座調高到30萬座;中國聯通已經建成26萬座5G基站,今年年底會達到37萬座。

從以上種種數據睇到,可能中國只係靠自己國內嘅5G市場都已經夠賺。

LEAVE A REPLY

Please enter your comment!
Please enter your name here