著名市場數據分析機構 Opensignal 近來發表咗關於5G網絡速度嘅排行榜。呢個排行榜係針對全世界多個國家同地區進行咗一次5G用戶網速體驗數據排名。

今次嘅5G網速數據主要係嚟自當前12個5G市場較為成熟嘅國家同地區。

通過測試分析得出:沙特阿拉伯喺所有測試嘅國家同地區當中平均下載速度最快,高達144.5Mbps;而加拿大則以平均下載速度90.4Mbps得到第二名;反而5G市場最成熟亦都係第一個推出5G網絡嘅國家韓國,平均下載速度只有75.6Mbps;而台灣就以71.5Mbps下載速度位居第四;排名第五嘅係荷蘭,下載速度為68.9Mbps。

第六名到第十二名分別為:瑞士、澳洲、香港、德國、科威特、美國、英國。
其中香港以48.2Mbps下載速度排名第八,而英國就以32.6Mbps下載速度包尾。
另外,美國嘅排名亦都有啲「出人意表」,僅僅以33.4Mbps嘅下載速度排喺英國前面。

而排名第一嘅沙特阿拉伯早喺2019年年初嘅MWC2019大會上面,已經同華為簽訂咗5G網絡建設合約,亦都係全球最早推出5G網絡服務嘅國家之一。

美國同韓國幾乎同時間推出自家嘅5G網絡。
尤其係韓國,作為全世界第一個推出5G流動網絡嘅國家,亦都係當今5G網絡普及率最高嘅國家,下載速度竟然只係排名第三。
而美國不斷打壓華為,並且標榜自己嘅5G技術唔需要靠華為亦都非常厲害,但係下載速度只係排倒數第二名。

5G技術喺2019年先至正式開始推出市場,原本預測今年會係5G技術迅速發展嘅一年,但係由於疫情嘅關係,令到全球各國5G網絡技術受到延誤。
根據當前形勢預測,全球主要國家同地區想要真正享受到5G網絡帶嚟嘅方便,應該要再等多至少三年時間。

LEAVE A REPLY

Please enter your comment!
Please enter your name here