美國同中國鬥到火紅火綠,而喺5G呢個領域上面更加係愈演愈烈。

美國已經宣佈咗禁用華為、中興等中國電訊設備,不過呢個禁制令亦都令到好多美國公司身受其害。
例如美國一啲鄉郊地區嘅電訊商好多都係使用價錢相對便宜嘅華為同中興設備。如果要移除呢啲設備,成本將會高達18億美金,而美國國會亦都未正式批出呢筆款項。

美國聯邦電訊委員會(FCC)日前表示,美國鄉郊地區電訊商報銷,替換中國電訊設備嘅費用需要18.37億美金。
美國國會到目前為止只係批准咗為電訊商報銷替換設備嘅成本,但係仲未正式批出呢一筆款項。FCC 估計,成本當中有16.2億美金符合報銷條件。

FCC 6月正式將華為同中興定為「美國國安威脅」,禁止美國公司使用聯邦政府資助,購買華為同中興嘅設備。FCC舊年亦已經通過法案,要求鄉郊地區電訊商移除華為同中興嘅設備。

據 FCC 嘅資料顯示,目前使用華為同中興設備嘅美國電訊商,數量超過50間,主要係一啲比較小型嘅電訊商。不過某啲較大型嘅公司好似 CenturyLink 同 Verizon 都有用華為同中興嘅設備。

Verizon 表示,旗下網絡依家已經冇用華為或中興設備,但係部分客戶用緊嘅 VoiceLink 裝置係由華為製造。不過呢批裝置預計今年之內都會停用。

而 Verizon 亦都啱啱同三星簽訂咗一份價值66億美金嘅5G合約。合約有效期為6月30日至2025年12月。

今次係自從三星幾年前決定投資網絡,同諾基亞、愛立信、華為幾間主要5G公司競爭以嚟,簽成最大嘅一份合約。

由於美國封殺華為嘅行動,分析預料三星將會「漁人得利」,喺5G網絡設備嘅市場佔有率有所增長。

LEAVE A REPLY

Please enter your comment!
Please enter your name here