自今年1月份開始慢慢推出之後,Rogers 已經喺蒙特利爾、渥太華、多倫多同溫哥華嘅市區中心地段推出咗加拿大第一批5G網絡。

不過如果要試用最新嘅5G服務,用戶就要擁有一部5G電話,暫時選擇只得三星新出嘅 Galaxy S20 系列。同時亦需要選用無限數據套餐。

Rogers 表示,預計今年內會推出5G網絡嘅加拿大城市會增加到20個。 同時,Rogers 亦會開始使用600MHz低頻譜,5G覆蓋範圍將會擴大,而且室內連接都會更加穩定。
Rogers 最終目標係將現有4G LTE頻譜轉去俾5G用。

Rogers 會喺2021年3月6號之前免費提供5G服務,之後就需要加大概20加幣附加費。

之前好多加拿大人已經埋怨加拿大嘅流動電話網絡收費相對其他國家貴。依家再要為5G服務添收附加費,相信好多人暫時都未必會選用呢個服務。

加拿大創新科技工業部長 Navdeep Bains 最近亦曾經警告過加拿大三大運營商(Rogers, Bell 同 Telus)有需要將中度用量嘅服務計劃價錢降低25%。咁先有希望可以吸引到更多客戶轉用5G網絡,令5G網絡更快得以普及。

LEAVE A REPLY

Please enter your comment!
Please enter your name here