香港5G服務推出咗大半年,當各大網絡商都努力爭取緊流動網絡用戶嘅時候。數碼通就嘗試向另一個方向發展,搶先推出5G家居寬頻計畫。

雖然 sim卡家居寬頻並唔係咩新鮮事,但係數碼通就認為無線家居寬頻會喺未來市場佔一個重要地位。

只要可以接收到5G網絡嘅地方就即刻可以用,唔需要任何拉線或接駁。所以佢哋預測5G家居寬頻有機會可以取代固網寬頻。

數碼通發言人表示,若果以網絡速度比較,光纖極速嘅速度的確會更快。但係依家好大部分消費者喺使用網絡嘅時候,主要都係睇片、瀏覽網頁或者進行網上工作等等。一般10Mbps至20Mbps之間嘅網速已經足夠,5G嘅速度同傳統固網寬頻比較分別唔大,長遠睇有機會取代固網寬頻。

因為無線家居寬頻比較方便,唔須要上門安裝,只要屋企位置接收到5G訊號就可以。
有統計顯示全港或者有兩成家庭,因為住村屋、單棟樓或者傳統別墅而安裝唔到寬頻。
數碼通亦透露,5G家居寬頻推出以嚟,反應比預期更好,已經有幾千家用戶。

數碼通相信5G普及嘅速度會比4G更快,預計香港由4G過渡到5G只係需要兩年。

另外數碼通日前推出咗新嘅5G月費計劃,將入場門檻降低,月費$328就有35GB 5G數據用量。佢哋根據一般用戶使用手提電話嘅習慣估計,普遍都係瀏覽網頁同睇片,大部份人都唔需要每個月100GB咁大嘅用量。

LEAVE A REPLY

Please enter your comment!
Please enter your name here