經歷咗兩年幾嘅低迷之後,全球智能電話市場受5G嘅催化之下銷量開始反彈,晶片商嘅訂單量今季開始激增。

晶片界巨頭高通啱啱就公佈咗截至2020年9月27號今年第四季同全年業績。
財務報告顯示,高通第四季收入有83.46億美金,舊年同期係48.14億美金,增長73%。第四季純利係29.60億美金,舊年同期係5.06億美金,足足增加咗485%。

公司各項業務當中,手提電話晶片收入最高,有49.67億美元,相比舊年同期增長38%。

高通 CEO Steve Mollenkopf 表示,手提電話晶片係公司今季盈利嘅主要來源。另外使用高通5G晶片嘅物聯網設備同網絡設備,都對公司收入有大幫助。

高通預計隨住更多人購買 iPhone 12 同其他品牌嘅5G電話,智能電話銷量下年將會激增。2021年5G智能電話出貨量將會達到4.5億至5.5億部,至少係今年總數量嘅兩倍。

分析認為,好多智能電話品牌已經開始增加下年嘅生產量。如果華為一路都解決唔到零件供應問題。其他品牌將會受益,喺中國高階智能電話市場,蘋果將會成為最大受益者。

據了解,2021年小米、Oppo 將產能提高到2億部,增加咗差唔多50%。
5G 似乎令到開始去到樽頸位嘅智能電話市場,再一次復活。

LEAVE A REPLY

Please enter your comment!
Please enter your name here