雖然5G喺好多國家已經推出,而鄰近嘅中國更加行得比好多國家快。不過俄羅斯就反其道而行,並唔急於推出5G流動網絡。

俄羅斯幾間網絡營運商都未有任何消息將會幾時推出5G服務。

其中一個5G遲遲未能起步嘅原因係,大多數國家/ 地區已經將3.4-3.8GHz確定為推出5G服務嘅最佳頻譜。
但係喺俄羅斯,呢段頻譜仍然係屬於政府機構同軍隊專用。雖然一路都有聲音要求將呢段頻譜釋放俾電訊行業,但係到目前為止都冇任何進展。

政府嘅回覆係,監管機構唔願意重新分配3.4-3.8GHz範圍內嘅頻譜。
雖然各網絡營運商都一路有同有關當局磋商,但係暫時仲未睇到監管機構願意作出讓步。

俄羅斯並唔係完全冇適合5G嘅頻譜。 MTS (俄羅斯主要電訊商之一)喺7月就獲得覆蓋83個地區嘅24.25-24.65GHz頻段許可證,有效期至到2025年中。

美國最大嘅流動網絡營運商 Verizon 已經証明咗呢個頻段嘅 “mmWave” 係可以達到高速傳輸嘅效果。
不過佢嘅缺點係覆蓋範圍極細,並唔適合廣泛喺全國或城市範圍使用。

所以到目前為止,俄羅斯都未有任何5G推出時間表。

MTS 預計今年會投資約900億俄羅斯盧布(約12億美金),同舊年嘅支出大致相同。投資將會用喺擴大4G覆蓋範圍同埋銀行、娛樂、媒體以及零售等等非電訊相關領域。

之前 MTS CEO Alexey Kornya 講過就算公司有合適嘅頻譜,佢哋都唔會心急推出5G服務。因為佢覺得俄羅斯一般民眾對5G都冇特別嘅需求。

LEAVE A REPLY

Please enter your comment!
Please enter your name here