肺炎疫情令韓國5G用戶嘅升幅減慢,媒體報導指出,今年1月份南韓5G用戶只係新增咗29萬人,係自舊年4月5G開台之後最低增幅。

原先預期今年底5G用戶增至1500萬人嘅目標未必可以達到。網絡供應商之間嘅補貼促銷戰可能會喺5G推出唔夠一年內再度展開。

舊年8月開始,韓國5G用戶人數增長開始逐漸放緩。有預測擔心韓國三大電訊商會終止之前嘅協議,再次展開減價促銷戰。

韓國5G推出初期,三大電信商SK、KT同LG U+ 大灑金錢吸引用戶轉用5G服務,透過巨額補貼用戶購買5G電話。
但巨額嘅補貼為電訊商帶嚟沉重嘅經濟壓力。所以三大電信商就喺今年2月初 Galaxy S20 系列推出嘅時候達成協議,將電話補貼降到最低。

根據韓國科技部報告資料顯示,截至今年1月底,當地5G用戶總數達495萬人。

肺炎疫情對韓國電訊設備生產商亦做成好大嘅影響。以三星最新推出嘅 Galaxy S20 系列為例,發售第一天只係賣出7萬部,較前一代 S10 系列減少50%。

LEAVE A REPLY

Please enter your comment!
Please enter your name here