巴基斯坦IT及電信部長阿米努爾·哈克(Aminul Haq)表示,政府計劃喺2022年12月之前推出5G技術。

不過唔同領域嘅專家都對呢個預測表示懷疑,認為巴基斯坦需要更長時間,並且需要做出更努力嘅推動先可以全面推出5G流動網絡服務。

不過,所有專家都一致認同5G將會為巴基斯坦嘅經濟帶嚟巨大利益。

有流動網絡專家認為巴基斯坦電信管理局(PTA)首先一定要同信息技術部合作,立即採取行動,逐步提高4G嘅普及率,盡快達到4G普及率超過50%呢個目標。

巴基斯坦軟件業協會前秘書長 Shehryar Hydri表示,政府可能會喺2022年之前喺有限嘅地區推出5G。不過5G網絡真正喺全國普及可能需要三到五年時間。

原因係,要成功推出5G服務,電訊公司將會需要大量投資落5G許可證以及大規模網絡升級上面。
再加上消費者仲需要購買可以支援5G網絡嘅新款手提電話。雖然依家已經推出咗一啲中價嘅5G電話,但係對於巴基斯坦普遍民眾嚟講,可能仲要再等多幾年5G電話價錢先至會下調到符合佢哋嘅預算。

所以實際上5G嘅普及可能需要五至七年時間。

不過研究人員認為,喺興建5G網絡嘅基礎架構方面需要開發好多配套。呢方面亦都有助提供更多唔同嘅工作崗位俾巴基斯坦嘅國民。

LEAVE A REPLY

Please enter your comment!
Please enter your name here