巴西加入美國嘅打壓華為聯盟之後,據聞正在研究透過法律手段,去禁止華為參與5G網絡建設。

不過外界預料呢個決定將會受到極大阻力。巴西部分政要已經公開反對封殺華為。而大部份電訊商都表明咗唔會配合呢個封殺行動,並且警告如果政府一意孤行,有機會向政府提出索償。

據報道,巴西國家安全顧問 Augusto Heleno,正在同通訊部研究緊點樣通過法律途徑,去禁止華為參與5G建設。
消息人士指出,政府有可能會採用兩種方法,第一係限制華為參加5G頻譜拍賣,並且限制電訊商購買華為設備。第二就係將冇喺巴西上市嘅電訊設備商,排除喺5G網絡建設之外。

消息人士警吿以上兩種方法唔單止會阻礙5G技術發展,而且仲會對巴西同中國嘅貿易關係構成重大影響。
目前多數巴西電訊商都同華為有商業合作,最大嘅電訊商之一 Telefonica Brasil 有接近65%嘅流動網絡設備係由華為提供。

巴西主要嘅流動電訊商都反對政府跟隨美國封殺華為。美國副國務卿 Keith Krach 之前去巴西遊說4大電訊商嘅時候,得到非常冷淡嘅對待。

電訊商已經計劃好出年5G頻譜拍賣之後會採用華為嘅5G設備。有部分甚至已經用緊華為嘅設備進行緊測試。

加上美國要求封殺華為呢個做法,唔符合巴西長期主張嘅自由市場理念,所以電訊商們都唔支持呢個禁令。

LEAVE A REPLY

Please enter your comment!
Please enter your name here