隨住歐洲唔少國家決定唔批准華為參與興建5G網絡。
5G系統一直被歐洲流動網絡營運商視為入門級產品嘅三星,據聞正在努力爭取填補華為嘅空缺。希望可以搶佔歐洲5G網絡供應商呢個位置。

三星喺9月同美國一大流動網絡營運商Verizon達成60億美金嘅交易之後,西班牙嘅 Telefonica 同法國 嘅 Orange 都同三星進行咗初步接觸。

華為嘅硬件幾乎佔咗成個歐洲4G網絡嘅一半,本來佢同諾基亞、愛立信會一齊為歐洲各國建立高速嘅5G網絡。
但係歐洲好多營運商都因為承受咗美國嘅壓力,迫於無奈要放棄華為嘅5G系統。

而三星面對嘅其中一個大問題就係,好多營運商都擔心佢哋嘅產品唔能夠兼容華為現有嘅4G網絡。呢個情況將會令營運商額外使一筆幾億美金嘅錢去淘汰並且替換現有嘅硬件,而唔係簡單咁升級就可以。

三星發言人就表示,三星設備同網絡商現有嘅設備唔兼容呢個念法係一個誤解。不過佢就冇詳細解釋,亦冇提出一啲實質嘅數據去証明。

Orange 嘅高層之前都有透露過會考慮喺歐洲市場使用三星嘅5G網絡設備。

不過 Orange 喺歐洲仲未揀定5G設備供應商嘅國家只係得番波蘭同羅馬尼亞兩個。

始終成本都係一個重大考慮因素,如果需要更換現有嘅網絡設施,價錢可能會好高。
之前加拿大嘅 Bell 決定放棄使用華為設備,分析師就估計幾年之內更換現有4G設備嘅成本大約要2億加幣。

之前亦有消息指出,歐洲最大嘅流動網絡營運商德國電信(Deutsche Telekom)對三星嘅5G設備係咪真係可以喺短期內保持競爭力,仍然抱懷疑態度。

LEAVE A REPLY

Please enter your comment!
Please enter your name here