中國工信部下屬嘅中國信通院喺9號發佈嘅數據顯示,2月內地智能電話出貨量為638.4萬部,其中5G電話有238萬部,佔總量37.3%,已經接近4成。
不過,從銷量嚟睇,2月5G電話出貨量冇延續之前三個月都超過500萬部嘅好成績。

有關數據仲顯示,今年2月新上市機型總共有16款,較去年同期下降61%,其中4G電話有4款,5G有11款。5G電話已經成為上市新機型嘅主力。

有業界人士表示,由於疫情嘅影響、換機周期變長同大家對5G採取觀望態度,導致2月出貨量大幅下降。

當然,3月份亦會有唔少新機即將發表。過去短短9日已經有黑鯊 3、Realme 6 Pro、Vivo APEX 2020 概念機、OPPO Find X2 等等新款5G電話發表咗。

而嚟緊嘅幾個星期亦陸續有來。
首先今日 Vivo 會發表舊年旗艦機 NEX 3 加強版 NEX 3s。Nokia 就會喺 3 月 19 號嘅倫敦舉辦一場活動發表多部新機。
Redmi Note 9 以及 Redmi K30 Pro 就定喺 3 月 12 號登場。
壓軸就係華為年度大作 P40 系列喺巴黎時間 3 月 26 號舉行發佈會。

另一陣營,蘋果嘅 iPhone SE 2 就傳聞會喺 3 月 31 號舉辦嘅春季發佈會推出。
不過由於疫情影響,發佈會有機會改為以網上直播型式舉行。

但係亦有可能因為工廠復工緩慢影響生產量而推遲新機發表,iPhone SE 2 嘅發表仲係有好多變數。不過就算可以如期上市,初期供貨量都會非常緊張。

LEAVE A REPLY

Please enter your comment!
Please enter your name here