韓國係全世界最先擁有5G網絡嘅國家,佢哋嘅5G服務喺2019年4月3號正式推出。
服務自推出以嚟用戶不斷增加,目前已經有接近1100萬人。

韓國5G用戶人數接近1100萬。韓國科技信息通信部數據顯示,韓國5G用戶喺2020年11月底已經達到1090萬。

呢個數字亦都代表住韓國5G用戶喺11月份增加咗接近100萬,高過前一個月增加嘅73.5萬。

5G用戶達到1090萬之後,5G用戶喺韓國流動通訊用戶中嘅比例,亦有提升。目前韓國流動通訊用戶有7050萬,5G用戶佔咗15.5%。

隨住更多用戶轉到網速更快、時延更短嘅5G,亦即係話4G用戶有所減少。
數據顯示,韓國4G用戶喺11月份減少咗68萬。不過整體4G用戶人數目前仍然高達5330萬,喺數量上仍然佔主流大多數。

韓國5G用戶已經突破千萬,自舊年下半年開始,5G服務質量亦都有所改善。
不過當5G有改善嘅時候,4G嘅網速就受到一定影響,令到韓國好多仲用緊4G嘅用戶不滿。

韓國政府表示,各大流動網絡提供商大力發展5G嘅同時,亦都要照顧好仍然屬於大多數嘅4G用戶。
所以政府之後將會定期檢測評估5G同4G網絡服務質量,並敦促各個網絡提供商加強對4G網絡嘅維護,務求保持4G網絡應有嘅質素。

LEAVE A REPLY

Please enter your comment!
Please enter your name here