Tele2 宣佈諾基亞將會成為佢哋5G網絡嘅核心合作夥伴。

諾基亞表示將會聯手 Tele2 為瑞典、拉脫維亞、立陶宛同愛沙尼亞提供5G核心設施同5G語音技術。

瑞典一直以嚟對於華為參與5G網絡建設嘅安全問題立場都唔係好清晰。就好似網絡提供商 Tele2 咁,佢哋一直唔願意透露合作供應商嘅名單,亦曾經講過中國公司係「可以合作」嘅供應商。

不過就算華為自稱願意滿足瑞典政府任何「特殊要求」,佢哋最終都係被正式排除喺參與5G網絡建設嘅名單之外。
喺所有嘢都塵埃落定之後,較早前因爲斯德哥爾摩行政法院批准華為訴訟而被暫時推遲嘅5G頻譜拍賣,亦都可以再次重啟。

預計3.5 GHz同2.3 GHz頻段嘅牌照拍賣會喺今個月19號進行。

諾基亞喺一份聲明中表示,隨住世界各國陸續進入5G時代,諾基亞同 Tele2 嘅長期合作關係都會不斷擴大。
而根據 Tele2 嘅講法,佢哋嘅5G核心基礎架構將會喺2021年進行初步部署,並會同時支持4G同5G連接,為用戶提供更高速度、更低延時嘅流動網絡。

2020年6月開始,瑞士 Tele2 已經喺斯德哥爾摩、哥德堡同馬爾默推出咗5G流動網絡,服務亦都已經擴展到瑞典30幾個城市。

LEAVE A REPLY

Please enter your comment!
Please enter your name here