瑞典電訊設備製造商愛立信反對自己國家政府對競爭對手華為嘅禁令。佢哋究竟係因為喺中國嘅壓力之下而作出呢個舉動,定係佢哋真係想堅守自由貿易呢個理念呢?

愛立信 CEO Borje Ekholm 喺11月就曾經批評瑞典決定禁止華為參與5G網絡呢個決定。佢喺接受訪問嘅時候表示,呢個做法限制咗自由貿易同競爭。

原來佢私底下更加係大力反對當局呢個做法。 瑞典有報章公開咗 Borje 向斯德哥爾摩政府部長發嘅短信,當中提到呢項禁令嘅時候,佢話:「就目前嚟睇,瑞典並唔係一個適合愛立信留喺度發展嘅國家。」
佢更加補充話,完全理解點解歐洲科技公司數量得咁少。

禁止華為參與5G呢個決定並唔係由瑞典中央政府直接做出嘅。而係由電訊監管機構根據國家安全部門同武裝部隊嘅建議作出。
不過愛立信 CEO Borje 就認為華為唔單止係佢哋嘅競爭對手,而且係製定全球網絡標準嘅合作夥伴。

雖然 Borje 有佢嘅道理,但係其他人就認為,愛立信可能係因為受到中國嘅壓力而代為發聲。因為佢哋喺中國網絡設備嘅銷售量遠遠比瑞典高。

LEAVE A REPLY

Please enter your comment!
Please enter your name here