印度流動網絡提供商 Bharti Airtel 尋日首次試用咗自家嘅5G網絡。測試係喺海得拉巴地區使用1.8 GHz頻段進行。
舊年 Bharti Airtel 使用印度製造嘅愛立信硬件升級咗現有網絡,令到公司可以隨時提供到5G網絡服務。

不過 Bharti Airtel 嘅 CEO 認為使用 1.8 GHz 去開通 5G 服務呢個做法並唔理想。他相信要等到政府為 5G 網絡分配中頻帶頻譜(2.5-3.7 GHz)之後,先至可以真正體現到 5G 網絡嘅好處。

由於目前中頻段頻譜仲未進行拍賣,暫時唯一嘅選擇就係 4G 同 5G 網絡一齊使用相同嘅頻譜(使用動態頻譜共享技術)。
但係呢個做法會令到 4G 用戶嘅網絡可用容量減少,而 5G 嘅性能亦唔能夠得到全面發揮。 所以目前仍然未有流動網絡提供商決定推出 5G 服務。

Airtel 相信,當公司得到中頻帶頻譜(2.5-3.7 GHz)之後,佢哋嘅 5G 網絡可以提供比依家快10倍嘅高速傳輸,同時亦可以將延時降低10倍。到時用戶甚至唔需要更換SIM卡都可以使用到 5G 網絡。

印度原本應該喺舊年進 5G 頻段拍賣,但係由於電訊行業不景氣而推遲咗拍賣計劃。
暫定頻段(3.3-3.6 GHz)嘅最新拍賣日期會係今年下半年。

Airtel 指出,佢哋嘅客戶裏面已經大概有100萬人擁有支持 5G 嘅電話,不過目前所有呢啲 5G 電話都只能夠使用 4G 網絡。

至於 Airtel 嘅對手 Reliance Jio 喺舊年12月就宣佈咗計劃喺2021年下半年推出 5G 網絡。

LEAVE A REPLY

Please enter your comment!
Please enter your name here