韓國科學及信息通信部一份報告顯示,截至2020年尾,韓國擁有1185萬名5G流動網絡用戶。

喺2020年12月,韓國幾間網絡提供商總共增加咗大概90萬名5G用戶。
截至12月底,目前韓國5G用戶佔咗全國7050萬流動網絡訂閱總數嘅16.8%。

報告裏面亦都預測隨住三星新旗艦 Galaxy S21系列上市,以及網絡提供商推出通過網上辦理嘅平價5G數據計劃,5G流動網絡用戶人數將會進一步加快增長。

不過一路都有報導,韓國好多由4G轉用5G嘅用戶對現有嘅5G網絡質素都唔滿意。
普遍對三大網絡提供商旗下5G服務嘅投訴都係話速度慢,兼且冇一啲可以充分利用到5G優勢嘅應用程式可以使用。

韓國工信部最近嘅一份報告發現現有5G網絡平均下載速度達到 690.47 Mbps,係4G LTE速度嘅四倍多啲。
目前韓國嘅5G網絡係使用現有4G LTE網絡設備提供,並唔係獨立嘅5G網絡。

網絡提供商 SK Telecom,KT 同 LG Uplus 正準備正式推出獨立版本同埋 mmWave 版本嘅5G網絡。
mmWave 5G 服務開頭只係會提供俾商業用戶。 報告話營運商仲未確定對 mmWave 一般用戶嘅投資計劃,因為需要顧及興建額外設施嘅成本問題,佢哋唔確定一般用戶係咪真係需要使用 mmWave 呢個制式。

舊年7月,韓國三大網絡提供商 SK Telecom,KT 同 LG Uplus 同意到2022年會投資總共25.7萬億韓圜(220億美金)去發展全國5G基礎設施建設。
投資主要專注喺提高首爾同另外六個大城市嘅5G質量。

呢項投資計劃仲規定喺首爾地鐵2號同9號線,以及主要公路上面2,000幾個多功能設施裏面提供5G網絡。
到2021年,營運商承諾將5G網絡擴展到另外85個地區,包括4,000個多功能設施,地鐵同所有火車站以及20條高速公路。

LEAVE A REPLY

Please enter your comment!
Please enter your name here