5G網絡相繼喺好多國家已經推出咗，有啲國家更加已經做到好高嘅網絡覆蓋率。但係有部份國家都仲係處於起步階段。
好似羅馬尼亞咁，佢哋嘅電信市場監管機構（ANCOM）啱啱先至宣佈計劃今年第三季舉行5G頻譜拍賣。
ANCOM 計劃喺今年第二季落實選擇採用5G頻譜700 MHz，800 MHz，1500 MHz，2600 MHz，3400-3800 MHz 嘅程序。去到第三季就可以將選擇好嘅頻譜正式進行拍賣。
而 ANCOM 亦都會喺第四季開始展開有關5G網絡嘅宣傳活動。宣傳活動將會針對地方機關，商業用途同普羅大眾。
拍賣原本應該喺舊年進行，但係由於喺選擇網絡設備提供商嘅標準上面有改變而推遲咗。 根據估計，政府可以經5G頻譜拍賣而至少套現5.8億歐元。
2019年8月，羅馬尼亞同美國簽署咗關於安全開發5G技術嘅諒解備忘錄。備忘錄列出咗參與開發5G網絡嘅公司需要達到嘅幾個標準。其中包括要求投標公司符合法治同擁有高透明度。
其實即係再一次同排除華為5G設備有關。呢個決定亦都令到羅馬尼亞全面推出5G網絡遲咗一年。希望佢哋可以急起直追，唔好落後其他國家太耐。
