根據最新數據顯示，iPhone 12 Pro Max，12 Pro 同 12 已經成為美國三款最好賣嘅5G手提電話。
iPhone 12 系列只係推出咗大概4個月就有呢個成績，証明咗 iPhone 喺美國仍然係主流。
相信佢喺推動5G普及方面將會扮演一個重要角色。
報告係綜合咗銷量數據同埋由 Ookla Speedtest 用戶收集到嘅資料所得出。當中包含咗5G手機喺美國嘅累積銷量。
不過收集到嘅數據只係包括截至1月23號嗰個星期嘅銷售量。裏面係唔包括當時仲未開始出貨嘅三星 Galaxy S21 系列手機。
三星由2019年開始推出 Galaxy S10 5G 型號，2020年嘅 S20 系列更加已經全線支援5G。
除咗蘋果同三星，比較平嘅中階5G電話最近已經開始慢慢出現喺美國市場。雖然5G電話嘅選擇越嚟越多，但係5G用戶嘅增長速度仍然緩慢。
不過 iPhone 佔咗美國手機出貨量差唔多一半，所以 iPhone 可以令到5G網絡用戶人數增加亦都非常合情合理。照目前資料所得，呢個亦都係一個事實。
5G網絡嘅發展，當然唔可以單靠一款手機就有好大進展。各大流動網絡提供商都要一齊配合。
尤其係好多5G用戶都話覺得現時嘅5G覆蓋、性能都好似同4G差唔多，有時甚至更差。
希望呢個情況喺遲啲有更多5G頻譜可以使用嘅時候會有所改善。
