俄羅斯正式推出5G流動網絡。

據報導俄羅斯流動網絡提供商 MTS 已經推出咗俄羅斯第一個開放俾公眾使用嘅5G網絡。

5G絡覆蓋莫斯科14個人流較大嘅公共場所,並會為擁有5G智能手機嘅受邀用戶提供速度高達1.5 Gbps 嘅5G網絡。
對應嘅5G手機需要支持4.4 GHz至5 GHz頻率範圍內嘅n79頻段。

不過 MTS 就表示今次推出嘅5G流動網絡,係屬於初步試驗性質,係作為全面廣泛向所有用戶推出5G服務嘅測試。

MTS 總裁 Alexey Kornya 表示佢哋會邀請有5G手機嘅特選用戶試用今次推出嘅測試版5G服務。希望可以俾佢哋親身體驗5G嘅好處,例如超高清影片,AR / VR同雲端遊戲嘅實時低延遲連接等等。

測試亦都可以幫助 MTS 嘅專家喺實際使用情況下監察網絡架構性能同服務質素。確保之後正式向所有用戶開放使用嘅時候會有一個完善嘅網絡。

5G網絡覆蓋範圍涵蓋咗莫斯科一部份公園同購物區,包括著名嘅高爾基公園,莫斯科國立大學,Nikolskaya 街道,斯科爾科沃創新中心同VDNH展覽中心。

暫時 MTS 會透過短訊邀請合資格用戶參加5G網絡試用。希望之後盡快可以將5G網絡提供俾所有用戶使用。

LEAVE A REPLY

Please enter your comment!
Please enter your name here