為咗宣傳5G網絡嘅速度,低延時同可靠性,荷蘭 T-Mobile 策劃咗一個名為「不可能的紋身」嘅活動。

內容係關於世界上第一個由5G驅動嘅機械人幫真人紋身。 紋身過程係由紋身師 Wes thomas 遙距控制住一隻機械手臂幫女演員 stijn fransen 紋身。

成個由籌備到實行嘅過程被拍成咗一條差唔多4分鐘嘅紀錄短片。

片裏面可以睇到,紋身師一筆一筆咁畫喺人體模型手臂上面,而機械手臂就實時將佢嘅動作一針一針咁拮落嗰位女演員手上面。

雖然兩個人身處唔同嘅地方,但係藉住5G嘅幫助,機械手同人手嘅動作一致,幾乎冇任何延遲。
通過呢個實驗,證明咗無論距離有幾遠,透過5G網絡都可以執行極微細毫米級嘅精密動作。

為咗達成今次嘅創舉,T-Mobile 特別搵咗一間名叫 the mill 嘅公司合作。由製造機械手臂,去到拍攝紀錄短片,the mill 都一手包辦。

荷蘭紋身藝術家 wes thomas 喺成個遙距紋身項目嘅研究同開發都全力參與,確保喺紋身過程當中種種精細動作都要被納入考慮因素當中。

經過喺多種唔同物件上面測試之後 (例如唔同嘅蔬果同人造皮膚)最終都成功喺 stijn fransen 手上面完成咗世界第一個5G紋身。

雖然個紋身係好細個,但係都體現咗5G技術嘅無限可能性。>一齊睇片啦<

LEAVE A REPLY

Please enter your comment!
Please enter your name here