美國有研究報告指出,mmWave 5G 喺各方面都比公共 WiFi 優勝。

mmWave 同 WiFi 都有一個共通點,就係兩者都需要用戶身處喺特定嘅範圍之內先至可以得到良好嘅連線體驗。

流動網絡提供商為咗俾到用戶一個穩定可靠嘅 mmWave 5G 服務,佢哋需要喺服務範圍內鋪設密集嘅 mmWave 天線。
因為 mmWave 5G 係使用高頻率,同埋好似 WiFi 一樣,覆蓋範圍比較細,傳輸距離有所限制。

報告裏面提到,喺 6 GHz 以下頻段上使用 5G 嘅時候,下載速度係 63.9 Mbps,只係比公共 WiFi 快3倍。 但係使用 mmWave 5G 下載速度可以比公共 WiFi 快30倍。

網絡研究人員分析所得,mmWave 5G 比公共 WiFi 優勝嘅地方大概可以歸納為以下三點。

第一個原因係因為其他信號嘅干擾。由於 WiFi 頻道係唔需要申請,任何人都可以設立自己嘅 WiFi 網絡。喺同一個區域裏面,可能有好多唔同嘅 WiFi 網絡都係使用相同頻率,導致產生干擾問題。

第二個原因就係比較舊嘅技術基礎。公共 WiFi 網絡都係經由有線寬頻提供。如果負責提供 WiFi 嘅寬頻線路係幾年前安裝嘅,安裝之後又冇更新過,佢提供嘅 WiFi 網絡自然亦都追唔上最新嘅網絡規格。

相比之下,流動網絡提供商會不斷升級系統同基站,確保選用5G嘅用戶可以得到更好嘅流動網絡體驗。

最後,第三個原因就係高速 WiFi 硬件不足。 就算有線寬頻可以提供到高速網絡連線,亦需要支援相關速度嘅 WiFi 路由器先可以傳送出高速 WiFi 信號。
依家最新最快嘅 WiFi 標準係 WiFi 6,並唔係所有公共 WiFi 都會持續更新硬件。

綜合以上幾個原因,公共 WiFi 嘅速度同穩定性確實係冇乜保障。

LEAVE A REPLY

Please enter your comment!
Please enter your name here