近日有德國媒體指出，中國深圳所擁有嘅5G基站，係德國國內5G基站數量嘅50倍。
深圳係中國其中一個5G網絡發展得比較快嘅城市。深圳嘅5G基站已經有4.6萬個，而德國成個國家都只係有大概850個5G基站。
擁有大約1300萬人口嘅深圳市，政府同幾間流動網絡提供商合作建立咗世界上最大嘅5G網絡。
同歐洲或者德國相比，深圳喺5G發展上的確係優勝好多。
雖然德國流動網絡提供商德國電信、Vodafone 以及西班牙電信都聲稱已經建立咗成功覆蓋幾百萬德國人嘅5G流動網絡。
不過佢哋嘅5G流動網絡並唔算係一個成熟嘅網絡，佢哋只係通過軟件更新，將現有嘅4G網絡轉做5G。
結果就係，雖然電話上面的確係出現接收到5G嘅標誌，但係實際上網速幾乎同4G冇分別。
如果計成熟而穩定嘅獨立5G基站，全德國加埋只係有大概850個。而中國淨係計深圳一個地方就有4.6萬個。
喺中國，中央政府同省級政府都大量資助5G設施嘅擴建計劃。
目前歐洲仍然處於第三波疫情當中，反觀亞洲某啲國家經濟已經開始慢慢恢復正常。
德國媒體最後亦指出，好多德國人都對中國喺5G發展嘅過程同方向非常有興趣，認為絕對有值得學習同參考嘅價值。
