德國 Vodafone 宣佈推出獨立 5G 網絡(5G standalone network)。

獨立 5G 網絡令到德國 Vodafone 成為全球最先進嘅 5G 流動網絡提供商之一。亦幫佢哋嘅網絡設備供應商愛立信作出咗一個非常出色嘅示範。

今次推出嘅獨立 5G 網絡,高通以及智能手機製造商Oppo都係愛立信嘅合作夥伴,一齊為發布做準備。
另外德國 Vodafone 亦指出,公司另一間網絡合作夥伴諾基亞喺最近幾星期都有參與獨立 5G 網絡嘅測試同準備工作。

今次獨立 5G 網絡嘅推出被認為係歐洲 5G 一個重要里程碑,可以預期喺未來兩三年內,獨立 5G 網絡將會擴展到整個歐洲大陸。

之前大多數網絡提供商推出嘅 5G 服務都係基於非獨立 5G 網絡。
愛立信亦解釋咗獨立同非獨立 5G 網絡兩者之間嘅分別。

同目前嘅非獨立 5G 網絡相比,獨立 5G 網絡唔需要依賴 4G(LTE)運作,具有更低延時,同容許更多人以及各類型連接對象同時使用流動數據。
而由於唔再需要同時連接 5G 同 4G LTE 網絡,支援獨立 5G 網絡嘅手機喺耗電量方面亦都減少咗接近20%。

德國 Vodafone 已經將使用3.5GHz嘅發射站轉做 5G,並將佢哋連接到 5G 獨立核心網絡。
暫時大約有1,000條天線分佈喺170個城市裏面。
到今年年底,Vodafone 計劃將獨立 5G 網絡天線增加到4,000條,當中會包括使用其他頻段嘅天線。

Vodafone 表示,第一款支援呢項技術嘅手機係使用 Qualcomm Snapdragon 888 嘅 Oppo Find X3 Pro。嚟緊將會通過自動固件升級進行更新呢項功能。
三星Galaxy S21 5G 系列預計喺5月開始亦都會通過固件升級支援使用獨立 5G 網絡。

LEAVE A REPLY

Please enter your comment!
Please enter your name here