截至2021年第一季,西班牙流動網絡提供商 Telefónica 已經將5G網絡覆蓋範圍擴大到全國80%以上人口。
而基站數目亦有4300幾個,覆蓋咗3700萬居民。網絡目前遍及西班牙1,253個城鎮。

Telefónica 喺2020年9月推出5G流動網絡服務,並承諾到咗2020年尾會喺921個覆蓋西班牙人口75%嘅城鎮當中推出5G網絡。

喺2021年第一季,公司重點項目係成功完成覆蓋舊年計劃咗嘅城市範圍,並覆蓋人口超過20,000嘅城市。

Telefónica 依家係使用 3.5 GHz同1.8-2.1 GHz頻段嘅頻譜去提供5G服務。西班牙政府預計會喺2021年第一季開放另一個5G頻譜當中嘅700 MHz頻段。

Telefónica 之前同諾基亞以及愛立信達成協議,會使用呢兩間公司嘅5G設備同服務。

而 Telefónica 嘅競爭對手 Orange 亦已經喺西班牙全國38個省當中嘅298個城鎮推出咗5G服務,人口覆蓋率係23%。
Orange 表示預計到2022年,佢哋嘅5G網絡將會可以覆蓋90%西班牙人口。

Orange 計劃通過使用非獨立(NSA)5G同埋動態頻譜共享(DSS)技術,喺今年年底之前為400個城市提供5G網絡,相當於人口覆蓋率超過51%。

Orange 嘅NSA 5G網絡覆蓋城市包括:
馬德里,巴塞隆拿,巴倫西亞,塞維利亞,馬拉加,加的斯,伊維薩,薩拉戈薩,洛格羅尼奧,萊昂,桑坦德,薩拉曼卡,巴利亞多利德同潘普洛納。

Orange 所使用嘅5G設備係嚟自愛立信,佢哋同樣係喺舊年9月喺西班牙推出5G流動網絡服務。

至於 Vodafone 就率先喺2019年6月喺馬德里,巴塞隆拿,巴倫西亞,塞維利亞,馬拉加,薩拉戈薩,畢爾巴鄂,維多利亞,聖塞瓦斯蒂安,拉科魯尼亞,維哥,希洪,潘普洛納,洛格羅尼奧同桑坦德推出咗西班牙第一個5G網絡。

合作嘅5G設備供應商係華為同愛立信。

LEAVE A REPLY

Please enter your comment!
Please enter your name here