馬來西亞正在準備推行一個大計劃,就係建立一個屬於國家嘅5G網絡。

由國家財政部創立嘅 Digital Nasional Bhd(DNB)負責推動呢項計劃。DNB 已經向八間供應商招標,包括:愛立信、諾基亞、華為、中興、三星、NEC、Cisco 同 Fiberhome。

預計呢啲公司將會對建設馬來西亞國家5G網絡提出議案,並希望佢哋可以提供到一個對馬來西亞最有利嘅解決方案,同時又可以滿足到國家對5G嘅需求。

對於可以成功勝出嘅供應商嚟講,呢份會係一份非常豐厚嘅合約。獲勝者將會負責設計同建造全球第一個國家級規模嘅單一5G網絡。

如果供應商成功實現咗價格合理而穩定嘅5G單一網絡,其他仲未推出5G嘅新興市場可能都會採用呢種模式。

不過呢個做法當然有一定難度。一間公司做哂,全個國家都係用同一個網絡。同一個網絡要覆蓋哂成個國家已經係非常具挑戰性嘅一環。

計劃預計喺年底之前開始推出測試服務,不過一開始推出嘅會係非獨立(NSA)5G網絡。 呢個做法可以確保就算5G網絡有任何出錯,其他現有嘅4G網絡都可以繼續使用。

DNB表示希望喺年中決定到選擇邊一間供應商。而DNB將會擁有頻譜權,並會喺嚟緊嘅十年內通過批發形式擁有同管理個別5G基礎設施。

成個項目嘅預算大概係36億美金,但係對於點樣籌集呢筆資金仲未有明確嘅答案。

之前馬來西亞財政部長曾經表示將會由私人出資,但係新任命嘅DNB CEO 就預計會由政府出資。

其實馬來西亞嘅5G流程都幾混亂,政府舊年6月喺24小時後宣佈收番啱啱發出咗嘅5G牌照。

LEAVE A REPLY

Please enter your comment!
Please enter your name here