目前印度正在面對緊非常嚴峻嘅第二波疫情大爆發,單日確診連續18日超過30萬。

隨住疫情越嚟越嚴重,開始有好多人誤信傳聞,話疫情爆發係由5G信號塔測試所引致。

近日印度社交媒體上面流傳咗一啲關於「5G網絡測試導致印度第二波疫情」嘅評論,其中講到5G信號塔嘅輻射同空氣混合形成毒性,導致民眾呼吸困難同死亡。
評論更加試圖呼籲民眾阻止印度政府進行5G測試。

由於傳聞越傳越烈,印度通訊部亦都要出面進行闢謠 。
通訊部表示佢哋注意到各社交平台上面流傳緊一啲關於5G引起第二波疫情嘅誤導信息。佢哋再一次重申,所有呢類傳聞都係錯誤嘅。

最重要嘅係,印度依家根本就未開始進行任何5G網絡測試。
民眾將5G技術同疫情大爆發掛鈎係冇任何科學根據嘅。

有媒體表示相關嘅謠言最先係喺 WhatsApp 上面出現,跟住一傳十十傳百,越嚟越多人唔去求證之下就亂咁傳,同時亦都信以為真。

嗰段 WhatsApp 嘅內容大概係:
「呢次疫情已經係第二次出現,大家都話係新冠疫情,但其實係因為政府測試咗5G信號塔所引致嘅。信號塔釋放出嘅輻射同空氣混合造成有毒氣體散播。呢個就係點解有人會呼吸困難甚至死亡嘅原因。亦因為咁,我哋需要要求政府停止測試5G發射塔,咁所有人都會冇事好番哂。」

希望唔好再有人傳同相信呢啲假消息,將焦點放番喺抗疲度相信對廣大印度國民嚟講先係最實際。

LEAVE A REPLY

Please enter your comment!
Please enter your name here