愛立信同 Volvo 宣佈已經成為第一間公司成功完成喺兩個國家之間無縫連接5G流動網絡嘅互聯汽車測試。

完成呢個測試嘅地點係瑞典 AstaZero 測試場。測試場係由歐盟資助嘅 5GCroCo 項目其中一部分,呢個項目正在為法國梅斯,德國梅爾齊格同盧森堡之間嘅5G走廊沿線大規模聯網汽車試驗做準備。

由愛立信同 Volvo 進行嘅 AstaZero 追踪測試非常成功,證明咗就算跨越兩個國家嘅邊境仍然可以保持到5G網絡嘅無縫連續性。

今次測試成功對於汽車業係一個好消息,因為5G跨界連接對於聯網同自動駕駛汽車由一個國家穿越到另一個國家嘅時候,兩國之間嘅連續駕駛體驗非常重要。
可以確保由一個國家進入另一個國家嘅時候可以持續保持連線。

揸車跨越邊界通常係長途旅行嘅其中一部分,而長途旅行其中一樣最需要嘅就係高質嘅地圖。
愛立信同 Volvo 試驗利用5G技術去確保喺車上面可以接收到最新嘅實時信息,可以不斷更新地圖。對於將來嘅自動駕駛汽車亦都有好大幫助。

喺測試裏面,愛立信負責提供5G流動無線網絡,而兩架 Volvo 汽車就成功實時接收到前面路線嘅高清地圖。
Volvo 提供嘅高清地圖應用程式可以預先得到有關前面直路同彎路嘅資料,加上其他實時道路情況。
以上嘅資料都可以幫助汽車同司機更有效咁掌握路面上唔同嘅情況,咁樣亦都可以幫助減少意外發生。

LEAVE A REPLY

Please enter your comment!
Please enter your name here