由於受到疫情影響嘅關係,加拿大將5G頻譜嘅拍賣時間推遲咗。嚟緊終於都可以重啟啦。

5G流動網絡其中一個好重要嘅頻譜3500MHz,加拿大各個流動網絡提供商都對呢個拍賣期待咗好耐。
本來加拿大計劃2020年6月舉行拍賣,但係受疫情影響一拖再拖之下,直到依家先正式開始。估計成個拍賣會持續幾星期,政府將會喺172個加拿大服務地區批出1504個牌照。

Bell、Telus 同 Rogers 係加拿大三間最大規模嘅流動網絡提供商,佢哋加埋差唔多佔咗成個加拿大市場嘅90%。
一啲將會參加今次拍賣嘅小型網絡提供商認為,最近頒佈嘅特殊監管規定有偏袒三大網絡提供商之嫌。

其實加拿大好多流動網絡用戶都對三大網絡提供商有不滿。因為佢哋嘅收費對比其他國家嚟講相對地高。之前加拿大政府曾經警告過幾間網絡提供商如果唔將費用降低25%,政府將會採取行動去干預。

對上一次嘅5G頻譜拍賣係 600MHz,最終成交價大約 28.7 億美金。
而今次嘅拍賣將會有23間公司參與競投,其中包括地區性網絡商 Cogeco、Quebec 旗下嘅 Videotron。

有幾位大學網絡通訊專家都認為,今次政府將覆蓋區域分成小區拍賣呢個做法非常好。之前用成個省份做區分導致一啲比較細嘅網絡提供商冇能力去競投。
今次呢個做法就可以俾各間唔同規模嘅公司都可以參與。

LEAVE A REPLY

Please enter your comment!
Please enter your name here