有電訊分析機構對韓國 5G 網絡進行咗最新分析。
結果顯示韓國 5G 網絡係全世界 5G 網絡當中嘅表表者。

韓國一直以來都係 5G 網絡其中一個重要嘅推動者。佢哋好早已經完成關鍵中頻同毫米波 (mmWave)頻譜嘅拍賣。
韓國三大流動網絡提供商喺 2019 年已經正式推出 5G 網絡服務。

報告裏面提到喺 2021 年 5 月 6 號至 5 月 17 號期間對三大 5G 網絡提供商進行嘅測試結果,當中包括釜山、光州、仁川同首爾在內嘅四個主要城市。

測試包括首爾 42 個室內位置,次數更多達 19,000 次。
其他三個城市亦喺 22 個室內區域做咗 9,000 幾次測試。

結果顯示三大網絡提供商 KT、LG Uplus 同 SK Telecom 喺覆蓋範圍方面都有改進,並且喺每個城市提供到超過 400 Mbps 嘅快速下載速度。

例如首爾,幾乎任何地方都可以成功接收 5G 網絡。每個網絡提供商嘅覆蓋率至少達到 93.2%(高過 2020 年下半年最少 71.3%)。
當中以 LG Uplus 嘅 95.2% 覆蓋率領先,之後係 KT 嘅 95%。

韓國光州市嘅 KT 同 SKT 覆蓋率分別下降到 75.4% 同 66.2%。不過報告指出,用戶喺絕大多數時間仍然可以喺呢兩個地方接收到 5G 信號。

韓國網絡提供商為用戶提供咗廣泛嘅 5G 覆蓋、高速同低延時呢啲 5G 優點之外,仲持續改進 5G 網絡嘅穩定性同埋帶俾用戶更多有用嘅 5G 相關應用程式。

而當中 LG U+ 所擁有嘅頻譜雖然比其他兩間網絡提供商少 20%,但係喺仁川同首爾嘅速度反而係最快。

LEAVE A REPLY

Please enter your comment!
Please enter your name here