高通啱啱對外表示,預計嚟緊會同 30 幾間流動網絡提供商以及電信設備供應商合作。呢啲網絡提供商同設備供應商全部都承諾會使用更快嘅 5G 網絡技術。

目前 5G 網絡使用多種技術。 當中被業內人士稱為 “sub-6” 嘅低頻版本優點係可以遠距離傳輸,但係速度上就只係比 4G LTE 網絡快少少。
而最快嘅 5G 版本係使用更高頻率,被全球最大智能手機晶片供應商高通稱為 “毫米波”(mmWave) 嘅 5G 制式。

mmWave 技術好處在於,喺一啲人口密集區域,當有好多人同時連接到流動網絡嘅時候都可以保持穩定同高速。例如喺球場裏面大量球迷同時將拍到嘅短片上傳到自己社交平台,mmWave 就有好大優勢。

高通係其中一間有份制定毫米波全球標準嘅公司,好多手機製造商例如蘋果,已經利用高通嘅晶片去獲得 mmWave 技術。
但係手機支援之餘,亦都需要流動網絡提供商嘅配合。

高通就表示,超過 30 間流動網絡提供商以及電信設備供應商已經承諾會盡快作出配合使用 mmWave 技術。

其中包括中國嘅中國聯通、台灣嘅中華電信、德國嘅德國電信以及澳洲嘅 Telstra 等等大型網絡提供商。

高通嘅晶片喺毫米波技術方面領先於聯發科等等嘅競爭對手,所以如果有更多人使用呢項技術,高通嘅收入亦會大幅增加。

不過高通 5G 技術發言人都承認,暫時只有美國同日本有限度地使用 mmWave,歐洲同韓國亦正在準備中。
隨住合作夥伴增多,可以預測到使用 mmWave 嘅國家將會快速增長。

LEAVE A REPLY

Please enter your comment!
Please enter your name here