隨住 Telstra 公佈流動網絡覆蓋範圍,將會有更多澳洲人可以使用高速嘅 5G 網絡。

澳洲流動網絡提供商 Telstra 之前公佈咗公司最新嘅網絡覆蓋範圍數據。

Telstra 喺 3G 同 4G 網絡方面表現非常理想,當然 4G 仍然係依家嘅主力。5G 正在處於起步階段,不過增長率都令人滿意。

4G 網絡基本上代表咗澳洲大部分手機用戶。Telstra 已經覆蓋咗 99.4% 人口,覆蓋面積超過 200 萬平方公里。公司表示,4G 網絡覆蓋面積之大,幾乎同 3G 覆蓋嘅 99.5% 人口,250 萬平方米睇齊。

至於 5G 網絡方面,目前仲未可以提供到相同嘅覆蓋範圍,不過 Telstra 表示 5G 網絡已經開始不斷增長,公司已經有超過 150 萬部設備連接咗 5G,覆蓋咗 75% 人口。

5G 用戶增長可能同舊年推出嘅 5G iPhone 系列有關,當然其他中低階比較平價嘅 5​​G 手機都係用家轉用 5G 網絡嘅一大原因。

Telstra 發言人表示,公司舊年嘅首要任務之一係將 Telstra 5G 盡可能帶俾更多用戶使用,而呢點佢哋亦都成功做到咗。
依家 Telstra 5G 大概覆蓋四分三澳洲人口。

Telstra 5G 已經擴展到郊區同農村等偏遠地區,而 5G 基站數量幾乎係其他競爭對手網絡商嘅三倍,覆蓋人數幾乎多出兩倍。

5G 網絡達到 4G 嘅覆蓋水平相信仍然需要一段時間。 不過隨住技術嘅進步,新 5G 技術 mmWave 將會喺嚟緊幾個月推出。配合現有嘅 Sub-6 技術,澳洲 5G 網絡速度同穩定性亦會大幅提高。

LEAVE A REPLY

Please enter your comment!
Please enter your name here