韓國信息通信技術部啱啱表示,韓國訂下目標希望喺未來五年內成立大約1,800間專門從事新5G服務嘅公司。目的係促進更多採用新一代5G流動網絡嘅創新技術。

雖然韓國喺2019年已經推出咗5G服務,但係坊間好多公司都仲未有一啲新技術或服務可以充分利用到5G高速網絡。例如遠距離遙控工廠、自動駕駛汽車又或者3D立體像真圖像等等。

信息通信技術部嘅目標,係由目前94間專門研發新5G服務公司嘅數量大幅增加。力求喺5G網絡相關技術上面擁有更強競爭優勢。

呢項計劃會支持推出5G相關服務嘅公司,包括包含AR同VR嘅網上課程,以及針對小型企業嘅多元網上商店。

隨住開發5G網絡相關技術公司數量增加。信息通信技術部嘅目標係去到2026年,應用5G服務嘅地點由目前195個增加到3,200個。

部門仲研究緊喺2023年建立一個全面5G化嘅城市,不過暫時呢個計劃都仲係處於規劃階段。

截至6月底,韓國擁有1650萬名5G用戶,佔全國流動網絡用戶總數23%。

LEAVE A REPLY

Please enter your comment!
Please enter your name here