今年智能電話正式全面進入 5G 時代，不過隨住高通 S865 晶片售價飆升，令到旗艦 5G 機普遍比起 4G 時代再貴上一截。唔少品牌似乎開始將重點移向中階市場。
本月中有人透過檢測 Android 11 程式碼發現，Google 下一部 Pixel 智能電話可能唔再係旗艦定位。有機會改用同樣支援 5G ，但係效能低啲嘅高通 S765G 晶片。新機推出嘅時候可能會壓低價錢去吸引消費者購買。
至於韓國品牌 LG 亦傳出將會採用相同策略。雖然已經發表咗旗艦機 V60 ThinQ，部機更加獲得一衆科技網站高度評價。
但係品牌另一大旗艦 G 系列今年傳出會改變以往嘅定位。據韓國消息指出，下一代 G9（暫名）將唔會跟隨 V 系列採用 S865，而係改用 S765G。
外國媒體分析，S765G 之所以開始越來越多品牌選用，原因自然係旗艦晶片太貴，三星、Sony 新一代 5G 機售價都有明顯提升。另外 S865 必須外掛 5G 晶片，先至可以真正支援 5G 網絡，而 S765G 就唔需要，更加慳位，可以容許製造商塞入更多其他零件，例如更多相機鏡頭、更大嘅電池。
