一路以嚟5G嘅用途俾咗好多幻想空間大家。

最近西班牙流動電訊商 Telefónica 同巴塞隆拿交通局(TMB)聯同媒體公司合作打造咗一個融合 5G AR 嘅觀光巴士體驗。

當巴士路經唔同景點嘅時候,乘客就可以喺巴士車頭大玻璃窗見到唔同嘅相關內容。

呢個 5G AR 巴士遊係 「5GBarcelona」 計劃嘅一部份。5G 網絡可以做到實時下載路經地方嘅相關內容,然後將內容顯示喺位於巴士車頭玻璃窗嘅透明互動式屏幕上面。

例如,途中巴士會經過一個歷史悠久嘅噴泉,但係個噴泉依家正在修復當中唔會有水噴出嚟。但係透過屏幕睇出去嘅時候,會用虛擬配合實景令乘客睇到個噴泉係噴緊水嘅。

另外當架巴士穿梭城市唔同大街小巷嘅時候,屏幕上仲會顯示有關建築物同古蹟嘅歷史資料。

媒體公司 Mediapro Group 負責設計成個行程嘅體驗、旅遊資料、開發軟件同 AR 內容。佢哋更加負責埋透明屏幕嘅安裝。

Telefónica 就負責安裝高速5G網絡,確保巴士上面有足夠嘅上下載速度可以提供高清實時內容同廣播。

呢個巴士遊確實可以好好咁利用 5G 嘅好處。乘客唔再需要睇一啲死板嘅預錄內容,而係可以因應唔同嘅情況/ 地點而睇到唔同嘅實時內容同資訊。

LEAVE A REPLY

Please enter your comment!
Please enter your name here