四月一號開始，香港正式進入 5G 時代。之前已經有三間網絡商公佈咗 5G 服務月費。
而中國移動香港（CMHK）今日（31日）就舉行網上發佈會，正式宣佈將會喺4月1號零時零分正式啟動 5G 網絡服務。
CMHK 早前公佈旗下嘅 5G 月費計劃，最平月費只需要港幣$198就可以登記「5G體驗服務計劃」，而今日發佈會上亦進一步宣佈更多細節。
CMHK 表示佢哋 5G 網絡優勢有 3 個：佢哋係本港目前擁有最多 5G 網絡頻譜本地流動網絡營運商之一 (共 520 MHz)；擁有連續最寬嘅 3.3GHz-3.5GHz 頻段；少於 10ms 超低時延，下載速度達 1Gpbs，上載速度達 130 Mbps 嘅高速網絡。
公司喺首階段推出嘅 5G 網絡範圍覆蓋全港各區，全港戶外有超過 55% 面積受到 5G 網絡覆蓋。當中已佔 87% 市區戶外面積及 70% 人口覆蓋率。
另外，大埔、馬鞍山同赤柱呢幾個被稱為「5G 結界」嘅 3.5GHz 頻段限制區，喺初期仲未可以全面體驗 5G 服務，佢哋會透過重耕現時擁有嘅 4G 頻譜，升級作為 5G 頻譜使用，令到呢幾個地區嘅用戶亦可以用到 5G 服務。
而長遠亦會使用 4.9GHz 頻段作為呢幾個區域，以及絕大部分室內地方，包括：大型商場、辦公室等等嘅 5G 覆蓋。
目標係今年年底會將覆蓋面積提升到90%。
而室內嘅 5G 網絡覆蓋，主要喺全線 40 間 CMHK 門市、機場一號客運大樓、海港城、奧海城 2 期、屯門市廣場 1 期、中環置地廣場同灣仔會議展覽中心舊翼等等。
漫遊服務方面，喺 5G 服務啟用後，4 月 1 號同日已經可以實現中國及韓國 5G 漫遊，而於今年內亦計劃將 5G 漫遊服務，擴展至 10 個歐亞地區。
增值服務方面，CMHK 宣佈推出 UGAME 遊戲平台。由於遊戲透過雲端伺服器運作，唔需要預先下載到用戶電話上面就可以玩，所以唔受電話硬件效能限制，只要身處有 5G 覆蓋嘅地方，就可以極速及低時延模式玩遊戲。
CMHK 5G 用戶可以喺 6 月 30 號前享用 UGAME 體驗版，任玩當中近百款 5G 雲遊戲。
CMHK 5G 服務月費計劃，最低可以用 $198 月費就有 30GB 5G 全速服務 + 3GB 大灣區數據服務 (4.5G)，使用 30GB 服務後仍然可以使用 1Mbps 網速任用數據服務。
現有 CMHK 「飛常全球通」、「大灣區服務」(6GB 以上) 及 「4.5G 全速分享服務」用家，都可以另加 HK$88 或 HK$128，將現有服務升級至 50GB 或 100GB 5G 本地網絡服務。
