小米舊年9月發佈咗外形極度創新嘅小米Mi Mix Alpha智能電話。

Mi Mix Alpha 以一片柔性屏幕環繞式包圍機身,雙曲面兩邊接近 90 度延伸至機側,屏佔比超過180%,正面、側面、背面幾乎全部都係屏幕。小米將Mi Mix Alpha 上下邊框減少到2毫米左右。

原定計劃會喺舊年12月底限量試產,但由於製作難度比預期高,小米較早前宣佈會無限期延遲推出。

正當大家以為部機會胎死腹中嘅時候,小米尋日突然喺小米印度官方Twitter上面宣佈 Mi Mix Alpha 會以印度第一款5G智能電話登場。

Twitter 內容係話「聽日開始,小米Mi Mix Alpha 將會出現喺全國指定 Mi Homes。」

暫時印度小米網站只見部機嘅介紹頁面,見唔到價錢又或預訂/購買嘅選項。所以未知道正式發售價錢同日期。

Mi Mix Alpha 除咗突破性嘅屏幕,相機方機採用3 鏡頭設計。其中一個鏡頭達1.08 億像素並用上 1/1.33 吋超大感光元件,而且設有 4 軸光學防震。另外兩枚鏡頭分別為 2,000 萬像素超廣角鏡頭(支援 1.5 cm 超級微距拍攝),以及 1,200 萬像素人像相機,支援 2 倍光學變焦。不過佢係冇前置鏡頭嘅,因為要自拍嘅時候,你只需要將電話翻轉就可以用後置鏡頭進行自拍。

小米Mi Mix Alpha 價格高達19,999元人民幣。內地小米官網仲未有得賣,狀態係「敬請期待」。所以今次小米印度高調宣佈 Mi Mix Alpha 登陸印度小米實體店都幾令人意外。

雖然唔知到底係咪一次宣傳技倆,但係印度嘅米粉應該會係中國以外第二批見到 Mi Mix Alpha 真機嘅普羅大眾。

LEAVE A REPLY

Please enter your comment!
Please enter your name here