中國移動已經全面完成5G第一期工程建設,喺內地50個城市推出咗5G服務。

目前更加已經全面啟動咗5G二期工程設備測試同採購等工作。希望去到2020年底5G基站數目可以達到30萬個,確保2020年可以成功為全國所有地級以上城市提供5G網絡服務。

即係話中國移動2020年內仲需要建成25萬座5G基站。為咗達到呢個目標,中國移動2020年嘅開支預算係1798億人民幣,其中5G相關投資計劃約1000億。

中國移動近日亦公佈咗2020年5G二期無線網絡主要設備嘅採購結果,總共需要 232143 座5G基站,採購總額係 370.88億。根據呢個數字計算,單單一座5G基站價格就要16萬。

今次嘅採購名單包括華為、中興、愛立信同中國信科(大唐),採購價格大概係13.5萬至16.12萬之間。

其中,華為中標 133040 座5G基站,中標比例係57.25%,佔半數有多。佢哋嘅5G基站單價亦係四間供應商裏面最高嘅,達到16.12萬一座。

另外要留意嘅係,5G係一個龐大而復雜嘅系統,除了基站本身之外,仲需要有其他設施配合,例如:核心網絡傳輸設備、電力配套設備等等。如果計算哂所有設施嘅價錢,平均一個5G基站嘅成本其實會更加貴。
所以中國移動投資5G相關嗰1000億,可能實際上並唔算天文數字,或者只係啱啱夠用。

LEAVE A REPLY

Please enter your comment!
Please enter your name here