根據最新一項5G研究,各東南亞國家5G服務發展正在全力加速。
佢哋希望藉住5G引發嘅各種新商業模式可以促進經濟增長。
更加希望可以加強同喺相關技術領域處於領先地位嘅中國展開更多合作。

以泰國為例,其中一間主要流動通訊營運商 AIS 喺3月2號正式開始提供5G服務。喺曼谷各大主要車站同街道都可以見到好多5G相關廣告。

新加坡政府亦都喺4月底宣布,將會向主要電訊營連商新加坡電信公司等發牌,推動建設全國性5G網絡。新加坡計劃到2022年底5G流動網絡可以覆蓋全國一半以上地區,到2025年可以達到全國覆蓋。

研究顯示,喺5G領域方面處於領先地位嘅一直都係韓國同中國。不過之後東南亞有希望成為增長最快嘅市場。

全球移動通訊系統協會(GSMA)2019年發佈嘅報告指出,東南亞智能電話用戶數量將會由2018年嘅4.49億增加到2025年嘅5.1億。喺亞太地區,5G網絡到2025年有望佔據全球通信量嘅18%。

報導認為,5G喺東南亞迅速發展嘅原因係,大部份人都非常依賴智能電話。 好多商業活動例如租車、叫外賣、購物、娛樂等等,全部都係用電話就可以完成。

有專門研究世界各地唔同國家使用智能電話習慣嘅報告指出,佢哋對全世界46個國家同地區進行比較後發現,菲律賓人每日用電話上網嘅時間最長,達到5小時11分鐘,跟住係泰國,每日4小時57分鐘。全部都高過美國用戶嘅2小時42分鐘同日本嘅1小時32分鐘。

而疫情蔓延亦都促進咗呢啲地方5G嘅普及。因為好多人留喺屋企 work from home,通信量都大大增加。泰國同新加坡等國家更加嘗試5G遠距離醫療,令到偏遠地區嘅醫院透過5G網絡進行視像診症。

各個東南亞國家都期望藉住5G流動通訊嘅發展,可以幫助因為上半年疫情影響之下嘅經濟損失,促進經濟增長。

LEAVE A REPLY

Please enter your comment!
Please enter your name here