中美關係近期越來越緊張,美國亦出盡全力去封殺華為。
同美國非常好朋友嘅加拿大當然會同美國企埋同一陣線。

加拿大最大嘅兩間電訊公司啱啱星期二宣佈,會同瑞典嘅 Ericsson 、芬蘭嘅 Nokia 合作興建5G通訊流動網絡,拒絕俾中國嘅華爲參與。

有關消息透露,Bell Canada 同規模細少少嘅 Telus 都避免使用華爲5G設備。分析認為呢個決定可以緩和美國對加拿大政府施加嘅壓力。

加拿大第二大流動通訊服務商 Bell 宣佈,將會同愛立信合作,興建核心5G網絡。之前 Bell 亦聲稱,諾基亞將會提供5G相關嘅其他設施。

Telus 喺另一份聲明中就話,選擇愛立信同諾基亞作爲設備供應商。
至於加拿大另一間主要流動通訊營運商 Rogers 已經喺較早時候公佈咗會同愛立信合作。

加拿大政府仲未決定係咪俾華爲向各間公司提供設備。係全面禁止定係有限度容許,仲係評估當中。

另外根據一項專利調查公佈,最新數據顯示喺4G/5G關鍵專利方面,華為持有嘅數量排喺第一位。
其次係高通、諾基亞、三星、LG 同 Intel,愛立信排最尾。
包含華為、中興等在内嘅中國企業,擁有嘅5G 專利佔全球34.02%,當中數量最多嘅就係華為。華為以3147個專利位居榜首,比率高達15.05%,成為5G通訊行業嘅冠軍。

所以雖然華為受到美國不停追擊,但係仍然有好多國家肯同佢哋合作。
究竟呢一場5G大戰結果會係點,消費者會係最大贏家定係輸家?真係要慢慢睇落去先知。

LEAVE A REPLY

Please enter your comment!
Please enter your name here