繼加拿大兩大電訊營運商 Bell 同 Telus宣佈唔會使用華為5G網路設備之後,英國政府據報正在同南韓、日本嘅公司商討為英國提供5G網絡設備嘅事,希望可以搵到華為嘅代替品。

中國外交部表示,希望英國可以唔受其他國家嘅影響,保持政策獨立性,令到中國嘅公司可以喺開放、公平、冇歧視嘅環境之下同英國合作。
外交部更加強調,5G技術嘅發展必需要係世界各國共商、共建、共享嘅過程同產物。保護主義絕對不利於5G發展。

知情人士指出,英國官員已經就5G通訊設備採購嘅事,同日本NEC、南韓三星進行討論。呢個亦都係實現之前英國當局講過,希望英國5G供應商多元化,唔會側重於一間公司嘅講法。

英國今年1月決定將華為喺英國5G市場上嘅比率限制喺35%。並且將華為設備排除喺5G核心網絡之外。

但係由於受到美國嘅重大壓力,再加上疫情嘅關係令到中、英關係變得緊張。英國政府再一次重新考慮喺2023年之前將華為完全排除喺5G通訊網路之外。

但係之前亦有估計如果英國完全排除華為喺5G建設之外,將會嚴重拖慢英國嘅5G推進,更加會令英國遭受高達70億英鎊嘅經濟損失。

當某啲國家已經推出咗5G網絡嘅時候,英國仲喺選擇合作夥伴呢件事上面舉棋不定。相信5G發展被拖慢呢個講法並唔係冇可能。

LEAVE A REPLY

Please enter your comment!
Please enter your name here