台灣通訊傳播委員會尋日啱啱通過咗遠傳電信3500MHz、28000MHz頻段嘅5G牌照申請。
遠傳係繼6月3號中華電信之後,台灣第二個5G牌照。依照規定兩間電訊商都要喺牌照發出之後半年內開台,而兩間公司都講咗會喺7月正式推出5G網絡。

目前中華電信、遠傳電信仍然持續興建5G基站當中,預計到7月開台嘅時候,可以完成超過1,000個基站。初期主要覆蓋六個主要地區,到今年年底,兩間公司都預計可以完成3,000個以上嘅基站建設。

至於仲未攞到5G牌照嘅另外3間電訊營運商,目前個別進度分別係「台灣大哥大」已經申請咗5G基站網路工程檢核;「台灣之星」仲未提出工程檢核;「亞太電信」仲喺計畫審議階段。

照情形睇,最快可以實際推出5G服務嘅只會有中華電信同遠傳電信。而呢兩大電訊商亦開始積極宣傳各自將會推出嘅5G網絡。

遠傳電信嘅5G自動巴士,已經由5月底開始喺台北市信義路深夜時段試行。

中華電信今日亦推出全台灣第一架5G體驗公車,由聽日起會進行為期3星期嘅試坐活動。
大眾可以喺行駛當中嘅車輛上面實際體驗5G高速傳輸嘅寬頻影視,試驗5G同公共服務嘅結合。

中華電信表示,由推出4G第1年用戶數量達到133萬經驗推斷,5G開台後第1年用戶應該可以突破百萬,希望2021年底前可以去到150萬人。

LEAVE A REPLY

Please enter your comment!
Please enter your name here