中國移動5G智能礦山聯盟成立大會暨全國首座5G煤礦落成儀式今日喺山西太原舉行。
喺成立大會上面，中國移動聯合清華大學、中國礦業大學（北京）、陽煤集團、中煤科工、華為等等70幾個單位宣佈成立「5G智能礦山聯盟」，並宣佈喺陽煤集團新元煤礦正式落成中國首座5G煤礦。
新元煤礦擁有目前中國地下最深嘅5G網絡。希望透過呢個井下534米嘅「超千兆網速」煤礦5G專用網，可以實現煤礦智能化管理，解決煤炭行業各種問題。
中國移動聯同華為開發井下專用通信設備，取得全國首個5G網絡設備「防爆破」認證，並成功喺新元煤礦井下534米建成5G專用網絡。
推出無人巡檢、無人操作挖掘、無人操作採礦三項5G應用，幫助煤礦實現礦井無人化、自動化、可視化運行。
中國移動將會進一步利用5G流動通信技術帶動行業相關應用開發，聯同行業聯盟各合作夥伴一齊加速推進5G智能礦山發展。
中國移動聲稱，5G智能礦山聯盟嘅成立，可以推動傳統煤炭行業向數碼化、自動化、智能化方向轉型升級，進一步幫助礦山領域實現機械化、自動化，減少進入礦場人數從而減少意外。
